主场出击博反弹 水手开攻大爆发

今晚日职独脚戏，横滨水手主场硬撼鸟栖砂岩。水手今季战绩走晒样，主因系太过重攻轻守，尤其系主场出击，更加有前冇後、打死罢就，撞正状态曳爆嘅砂岩，水手必定藉地利狂攻博反弹，中位数3.5球嘅入球大照撑。（无綫myTV SUPER周三晚6时直播）

上季联赛亚军嘅水手表现大跌Watt，主因系今季接手执教嘅前利物浦球星基维尔，战术太过偏重进攻，导致入得又失得，最经典系亚冠盃决赛，首回合先赢艾阿恩2比1之下，次回合竟然狂输1比5，两回合计惨败3比6失落冠军，球队上下打击都几大。睇番水手各项赛事近9场成绩，法定时间赢得3场咁大把，近2场更连输畀福冈黄蜂同东京绿茵，难怪依家只系徘徊联赛中游。

另边厢，鸟栖砂岩亦唔好得几多，近4场联赛仅得1胜3负，包括日前喺主场出战柏雷素尔，喺领先1球之下，竟反输四个一皮，现时排紧尾3，状态差到冇朋友。水手今仗难得遇弱，梗系想趁主场之利博反弹，佢哋每逢主场例抢攻，近5次主场比赛，有4次开4球或以上，今场势必以攻代守，入波一定多，大盘咪错过。